Me rastin e festave të 7 – 8 marsit, të kthyera në një traditë të përvitshme tashmë, klasat e shtata organizuan një koncert festiv përshëndetës për nënat dhe mësuesit. Koncerti që u bë i mundur falë drejtorisë së shkollës në bashkëpunim me mësuesit e lëndëve kishte një përmbajtje të pasur me këngë, poezi, minidramatizim i një pjese teatrale si dhe një koreografi vallje popullore. E veçanta e këtij koncerti ishte një gërshetim i natyrshëm i dy kulturave: shqiptare dhe turke.

Nxënësit recituan vargje në gjuhën shqipe por interpretuan po kaq bukur edhe poezi në gjuhën turke. Gjithçka ishte përgatitur me seriozitetin që kërkojnë këto dy festa, por mjaft mbresëlënës ishte angazhimi i plotë i nxënësve të cilët në një ditë të vetme përmes një fjalë të ëmbël, një vargu, një notë muzikore apo një luleje të dhuruar dëshirojnë të tregojnë gjithë dashurinë dhe respektin e tyre kushtuar nënave dhe mësuesve në shenjë mirënjohjeje dhe falenderimi njëkohësisht, për përkushtimin e treguar në rrugën e gjatë e të vështirë të edukimit dhe arsimimit.

Suela Hoxhalli